Отворен повик за волонтер во Боливија – Поддржи активности за пошумување и заштита
Доколку си заинтересиран/а за заштита на природата, биодиверзитетот и работа со локални заедници, ова е одлична можност да стекнеш меѓународно волонтерско искуство преку програмата EU Humanitarian Aid Volunteering. Волонтерот ќе биде дел од проектот на организациите ASPEm и Armonía во Боливија, каде ќе придонесува кон активности за пошумување, зачувување на природните ресурси и еколошка едукација.
Што ќе работиш?
Како волонтер ќе бидеш вклучен/а во:
- активности за пошумување и обновување на шумските површини;
- производство на садници во локални расадници, во соработка со жени од заедницата;
- следење на развојот на засадените дрвја, состојбата на почвата и животната средина;
- мониторинг на растенијата, контрола на штетници и поддршка при наводнување;
- логистичка поддршка за работилници за превенција и справување со шумски пожари;
- едукативни посети и активности со ученици од локалните училишта, со цел подигнување на свеста за значењето на високите Андски шуми, заштитата на водните ресурси и биодиверзитетот.
Поголемиот дел од теренските активности се одвиваат наутро и на отворено.
Што е обезбедено?
Организацијата обезбедува:
- сместување во заедничка куќа во Кочабамба, при што секој волонтер има сопствена соба;
- покриени основни трошоци (вода, струја, гас и интернет);
- лесен пристап до јавен превоз до местото каде што се реализираат активностите;
- подготвителна обука во Италија пред заминувањето;
- практична обука во Боливија за еколошка реставрација, пошумување и мониторинг на животната средина;
- онлајн средби со други волонтери за размена на искуства и учење;
- Youthpass сертификат по завршувањето на волонтерската активност.
Кој може да аплицира?
Се бара кандидат кој:
- има интерес за заштита на животната средина, пошумување и зачувување на биодиверзитетот;
- е мотивиран, одговорен и подготвен за работа во рурални средини;
- покажува почит кон различни култури и е подготвен за тимска работа;
- има интерес или образование од областа на биологија, агрономија, шумарство или сродни науки (се смета за предност);
- поседува добри комуникациски и организациски вештини.
Услови за учество
Кандидатите треба:
- да имаат помеѓу 18 и 35 години;
- да живеат во една од земјите што учествуваат во програмата (земји членки на ЕУ, Северна Македонија, Исланд, Лихтенштајн или Турција);
- да ја имаат завршено задолжителната Humanitarian Aid Volunteering обука;
- претходно да немаат учествувано во индивидуално EU Humanitarian Aid Volunteering;
- вкупното времетраење на сите претходни и ова волонтирање во рамките на програмите на ЕУ да не надминува 12 месеци.
Доколку сакаш да придонесеш кон зачувување на природата, да стекнеш нови знаења и да работиш заедно со локалните заедници во Боливија, не ја пропуштај оваа можност!
Целиот повик тука