Волонтирај во училиште во Краков
Доколку сакаш да стекнеш вредно меѓународно искуство и да придонесеш во поддршката на деца и млади со попреченост, оваа волонтерска можност во Краков, Полска може да биде вистинскиот избор за тебе. Специјалното училиште Special School No. 11 во Краков бара волонтери за 10-месечен ангажман, кој ќе трае од 4 септември 2026 година до крајот на јуни 2027 година.
Што ќе работиш?
Како волонтер ќе бидеш дел од секојдневните активности на училиштето и ќе ги поддржуваш учениците со потешки форми на попреченост. Твоите задачи ќе вклучуваат:
- поддршка во наставните активности и учење странски јазици;
- учество во часови по спорт, уметност, музика, информатика, готвење, театар, социјални вештини и други активности;
- помош при секојдневните потреби на учениците, како што се јадење, пресоблекување и одржување на хигиената;
- придружба и поддршка за време на училишни екскурзии и активности во Краков и други градови.
Работното време е 30 часа неделно, односно 6 часа дневно.
Покрај работата во училиштето, организацијата IB Polska организира редовни средби, работилници и активности за личен развој, интеркултурно учење, полски јазик и историја. Волонтерите се среќаваат еднаш месечно на заеднички состанок и еднаш неделно со ESC тимот на организацијата.
Што е обезбедено?
Организацијата обезбедува:
- бесплатно сместување во еднокреветни или двокреветни соби во станови изнајмени од IB Polska;
- месечна картичка за јавен превоз во Краков;
- надомест на патните трошоци согласно правилата на Европскиот корпус за солидарност;
- месечен џепарлак и додаток за храна.
Обука и поддршка
Пред заминувањето, волонтерите добиваат подготовка од испраќачката организација, а по пристигнувањето следува воведна обука организирана од IB Polska. Дополнително, Националната агенција на Полска организира обука при пристигнување и среднорочна обука, како и редовни месечни средби и работилници.
Кого бараат?
Повикот е наменет за млади на возраст од 18 до 30 години кои се:
- пријателски настроени, креативни и отворени;
- мотивирани да работат со луѓе;
- подготвени за емотивно предизвикувачка, но исклучително значајна волонтерска работа.
Предност имаат кандидати кои имаат искуство во работа со деца, млади или возрасни лица со попреченост, иако најважни се мотивацијата, емпатијата и желбата за учење.
Кандидатите кои ќе ја пополнат апликацијата ќе бидат контактирани од тимот на IB Polska, а избраните ќе бидат поканети на онлајн интервју со ESC тимот.
Целиот повик тука