Иднината според „ОПЕН АИ“ - поголеми даноци, помалку ризици, ВИ за сите
„Опен АИ“ објави низа предлози за тоа како да се преобликуваат богатството и работата во „ерата на интелигенцијата“. Предложената рамка е насочена кон три цели: поширока дистрибуција на просперитетот поттикнат од вештачка интелигенција, изградба на заштитни мерки за намалување на системските ризици и осигурување широк пристап до вештачката интелигенција, со цел економската моќ да не биде премногу концентрирана.
Меѓу предлозите е и идејата за создавање фонд за јавно богатство за да им се даде на Американците автоматски јавен удел во ВИ-компаниите и ВИ-инфраструктурата, дури и ако не инвестираат на пазарите на капитал. Евентуалните приходи би биле директно дистрибуирани до граѓаните.
Во предлогот има место и за зауздување на опасната вештачка интелигенција, нови надзорни тела и заштитни мерки против сајбер-нападите и биолошките закани. Од друга страна, се залагаат за проширување на електричната инфраструктура и забрзување на изградбата на инфраструктурата за вештачка интелигенција преку субвенции, даночни олеснувања или сопственички удели.